Mediefolk:
– Eg brenn for å gjere dei smått utilgjengelege prosessane i norsk politikk og utanrikspolitikk tilgjengeleg for vanlege folk, seier Emil André Erstad.
Foto: Tine Poppe / Samlaget
Emil André Erstad blir ny kommentator i Vårt Land
– Erstad vil bidra med unik kompetanse frå innsida av norsk politikk.
Emil André Erstad er tilsett i nyoppretta stilling som kommentator i Vårt Land, skriv avisa i en pressemelding.
29-åringen kjem frå stillinga som kommunikasjonssjef i Den norske Helsingforskomité. Han har òg bakgrunn som leiar for KrFU og rådgjevar for Knut Arild Hareide, men melde seg ut av KrF i januar i fjor.
– Emil André Erstad har unik erfaring frå politikkens bakrom. Vi er sikre på at han vil bidra til å forklare lesarane våre korleis pølser og politikk blir laga, seier Vårt Lands sjefredaktør Bjørn Kristoffer Bore.
– Han er kunnskapsrik på om både europeisk og norsk politikk, og har over lang tid vist fram ein veldig skarp penn. Han kjenner breidda i det kristne Norge særs godt. Han kan mykje om menneskerettar, religion og andre viktige tema for Vårt Land.
I 2016 gav Erstad ut boka Farvel, Syria.
I Vårt Land vert Erstad kommentator på heltid. Han startar i stillinga før sommaren og skal ha kontor i Hardanger. Han vil òg vere ein del til stades i Oslo, skriv Vårt Land i pressemeldinga.
– Eg brenn for å gjere dei smått utilgjengelege prosessane i norsk politikk og utanrikspolitikk tilgjengeleg for vanlege folk. Kva verdiar og menneskesyn som pregar politikken. Eg er overtydd om at kvalitetsjournalistikk og godt kommentarstoff er avgjerande i den tida vi lever i. Jobben som kommentator i Vårt Land er derfor på mange måtar draumejobben, seier Erstad i pressemeldinga.
