FORSVARER: Harvad-professoren Alan Dershowitz forsvarte Patti Hearst, O. J. Simpson og Klaus von Bulow, men det er kom folkerettsekspert han besøkte Oslo og talte Israels sak. Foto: Helge Øgrim
– USA har ikkje ei sak mot Assange
Wikileaks og Julian Assange har fått USAs fremste ytringsfridomsfundamentalist på si side.
– Eg kjenner meg nokså trygg på at korkje Storbritannia eller Sverige kjem til å utlevera Julian Assange. Dei amerikanske styresmaktene har ikkje noko grunnlag for å få Assange utlevert, seier Alan Dershowitz.
Han er no er utnemnd til Assanges forsvarsadvokat i USA, dersom det vert utlevering og sak.
Kven er så denne Dershowitz? Her er korleis han smålåtent presenterer seg sjølv: – Eg liker ikkje å skryta, men eg er truleg USAs mest kjende forsvarsadvokat, eg er òg den mest kjende professoren ved Harvard, og Harvard er det mest kjende universitetet i verda.
Hardporno og von Bülow
I USA går han mellom anna under kallenamnet «The first amendment machine», som laust omsett tyder noko slikt som «ytringsfridomslokomotivet».
Dei av lesarane som set pris på hardporno, kan elles senda Dershowitz ein venleg tanke neste gong de går inn på ei amerikansk nettside: Gjennom sitt forsvar av Harry Reems, som spela i Deep Throat, fekk Dershowitz legalisert «kjønnsorgan i rørsle» i 1976.
Dershowitz hevda andsynes Den amerikanske høgsteretten at det var eit brot med Reems grunnlovsvern å straffa han for å medverka i ein pornofilm. Høgsteretten sa seg samd. Dershowitz har elles fått frikjend den tiltala i tretten av femten drapssaker han har teke. Dei som har sett filmen om Claus von Bülow, hugsar truleg forsvarsadvokaten. Det var Dershowitz, som vart utnemnde til professor ved Harvard 28 år gamal, den yngste i historia.
– Kva gjorde deg så oppteken av ytringsfridom og det fyrste grunnlovstillegget (som vernar ytringsfridomen i USA red. merk.)?
– Eg har berre alltid vore oppteken av dette. Ei av dei fyrste sakene eg tok som ung mann, var for filmen Nyfiken gul, som vart sensurert i USA. Eg førde den saka for høgsteretten då eg var 29. Så tok eg Hair, som også var bannlyst i USA. Eg har vidare vore involvert i saka om The Pentagon Papers og vore forsvarar for Penthouse. Eg trur vi trygt kan seia at eg har vore involvert i så godt som alle dei store amerikanske sakene om ytringsfridom. Eg plar vinna. Eg er ein absolutist når deg gjeld ytringsfridom. Foreldra mine var ikkje nett lukkelege då eg forsvara nynazistar og deira rett til å marsjera.
Grunnlovstillegget gjeld alle
Den mest vidgjetne ytringsfridomssaka i USA i førre hundreår var truleg The Pentagon Papers, som var ein mange tusen sider lang gjennomgang av USAs involvering i Vietnam. Styresmaktene gav desse papira «Top secret»-gradering, men i 1971, via forsvarsanalytikaren Daniel Ellsberg, kunne New York Times presentera hovudfunna over framsida. NYTimes fekk straks rettsleg forbod mot dette, men då byrja ei rekkje andre aviser å publisera. Høgsteretten konkluderte med at avisene hadde rett til å publisera frå papira, og Ellsberg gjekk og fri.
– Eg takka ja til å representera Assange av di eg meiner at Wikileaks er det vår tids Pentagon Papers. Dette er berre det siste av mange åtak på journalistikk på internett, på sosiale medium og på bloggar. Eg skal gjera det heilt klårt for alle at det fyrste grunnlovstillegget gjeld for alle typar teknologi. Ein treng ikkje tønner med blekk for å ha ytringsfridom.
Dershowitz strekar under at det fyrste grunnlovstillegget kom i 1791, i ei tid då det knapt eksisterte aviser.
– Det kom av di folk som stod på gatehjørne og argumenterte og delte ut flygeblad, skulle verta verna frå overgrep. Det anonyme flygebladet har mykje av den same funksjonen som internett har i dag. På internett kan du lesa at eg har drepe kona mi, hatt sex med små born, er ein del av den jødiske verdskonspirasjonen. Eg liker ikkje dette, men eg lever med det, og eg forsvarar retten til å koma med desse påstandane.
Manning
I mai i fjor vart den amerikanske soldaten Bradley Manning arrestert i Irak. Han hadde lasta ned desse papira som Wikileaks seinare har publisert. Truleg er Manning kjelda til Assange, men Manning har så langt nekta for at Assange eller Wikileaks bad han om å stela desse papira.
Dershowitz er Obamas tidlegare lærar og reknar seg som ein ven med presidenten.
– Men no går altså dei amerikanske styresmaktene etter Manning og trugar han med alt mogleg. Var det slik du forventa at Obama skulle fara fram?
– Obama er lur nok til ikkje å gå etter Manning eller for den del Assange på eit reint ytringsgrunnlag. Justisdepartementet kjem til å gjera dette til ei sak om tjuveri. Dei kjem til å hevda at dette er ein konspirasjon mellom Manning og Wikileaks. Eg trur ikkje dei får til dette. Av den enkle grunn det ikkje er sant. Men maktar dei å tvinga Manning til å skriva under ei falsk forklaring, får eg høve til å forhøyra han i rettssalen. Då fell nok saka saman i alle høve.